सोलापूर – महाराष्ट्रातील क्रिकेटप्रेमींना मोठी आनंदाची बातमी मिळाली आहे. येत्या ४ जूनपासून पुण्यातील महाराष्ट्र क्रिकेट असोसिएशनच्या (एमसीए) गहुंजे आंतरराष्ट्रीय स्टेडियमवर महाराष्ट्र प्रीमियर लीग (एमपीएल) आणि वुमेन्स महाराष्ट्र प्रीमियर लीग (डब्ल्यूएमपीएल) या स्पर्धांचा थरार रंगणार आहे. या स्पर्धा सलग तिसऱ्या वर्षी आयोजित होत असून, यावर्षी लिलावासाठी तब्बल ६५८ खेळाडूंनी नोंदणी केली आहे. यामध्ये ४०९ पुरुष आणि २४९ महिला क्रिकेटपटूंचा समावेश आहे.
या महत्त्वपूर्ण उपक्रमाची माहिती महाराष्ट्र क्रिकेट असोसिएशनचे अध्यक्ष आणि आमदार रोहित पवार यांनी सोलापुरात पत्रकार परिषदेत दिली. त्यांनी सांगितले की, राज्याच्या कानाकोपऱ्यातील नवोदित, प्रतिभावान खेळाडूंना व्यासपीठ मिळवून देणे हाच या स्पर्धांचा मुख्य उद्देश आहे. स्पर्धेतील सामन्यांचे थेट प्रक्षेपण जिओ हॉटस्टार आणि स्टार स्पोर्ट्स २ या वाहिन्यांवर करण्यात येणार आहे.
स्पर्धेत सहभागी संघ:
🟡 एमपीएल २०२५ संघ:
- 4S पुणेरी बाप्पा
- PBG कोल्हापूर टस्कर्स
- रत्नागिरी जेट्स
- ईगल नाशिक टायटन्स
- सातारा वॉरियर्स
- रायगड रॉयल्स
🔵 डब्ल्यूएमपीएल २०२५ संघ:
- पुणे वॉरियर्स
- रत्नागिरी जेट्स
- पुष्प सोलापूर
- रायगड रॉयल्स
अकादमी स्थापनेची महत्त्वाची घोषणा:
महाराष्ट्रात क्रिकेट संस्कृती रुजवण्यासाठी आणि पायाभूत सुविधा निर्माण करण्यासाठी एमसीएने चार विभागीय क्रिकेट अकादम्यांची घोषणा केली आहे.
👉 पुण्यातील राज्यस्तरीय अकादमीचा नामवंत क्रिकेट प्रशासक अजय शिर्के यांच्या नावाने प्रारंभ केला जाणार आहे.
👉 या प्रमुख अकादमीनंतर पुढील विभागीय अकादम्या सुरु होणार आहेत:
- सोलापूर (पश्चिम महाराष्ट्र)
- दापोली (कोकण)
- छत्रपती संभाजीनगर (मराठवाडा)
- जळगाव (खानदेश)
या अकादम्यांमध्ये विशेष प्रशिक्षक, पंच, गुणलेखक, व्यवस्थापक आदींची नियुक्ती केली जाणार आहे. सप्टेंबर २०२५ पर्यंत पहिली अकादमी सुरू करण्याचा मानस आहे.
सोलापुरासाठी सकारात्मक संकेत
सोलापुरातील इंदिरा गांधी स्टेडियम आणि अहिल्यादेवी होळकर विद्यापीठाने एमसीएकडे प्रस्ताव सादर केले असून, तत्काळ करार करून सोलापुरात विभागीय अकादमी सुरू करण्याचे संकेत आमदार पवार यांनी दिले. या भागातील ग्रामीण आणि निमशहरी भागातील खेळाडूंना संधी देण्याचा मनोदयही त्यांनी व्यक्त केला.
म्हणाले रोहित पवार:
“एमपीएल आणि डब्ल्यूएमपीएलमुळे महाराष्ट्राला अनेक दर्जेदार खेळाडू लाभले आहेत. हे केवळ स्पर्धा नाहीत, तर क्रिकेट कुटुंब आहेत. खेळाडू, संघमालक, तांत्रिक टीम यांचे परिश्रम यामागे आहेत. लवकरच महाराष्ट्रातील खेळाडू देशाचे प्रतिनिधित्व करतील, यावर आमचा विश्वास आहे.“
प्रमुख उपस्थिती:
या पत्रकार परिषदेला एमसीएचे सचिव ॲड. कमलेश पिसाळ, अपेक्स कौन्सिल सदस्य सुनील मुथा, विनायक द्रविड, सुशील शेवाळे, मुख्य कार्यकारी अधिकारी अजिंक्य जोशी यांच्यासह सोलापूर जिल्हा क्रिकेट असोसिएशनचे अध्यक्ष दिलीप माने, व्हाईस चेअरमन श्रीकांत मोरे, सचिव चंद्रकांत रेम्बरसू, तसेच महिला आणि पुरुष संघांचे प्रतिनिधी उपस्थित होते.
