पालक आणि मुलांचं नातं मजबूत करा

मुलांसाठी सर्वात महत्त्वाचं नातं हे त्याच्या पालकांशी निर्माण केलेले नाते असते. एक मूल त्याच्या सभोवतालच्या जगाबद्दल त्याच्या पालकांकडून शिकते. मुले सुरक्षितता, प्रेम इत्यादींसाठी त्यांच्या पालकांवर अवलंबून असतात. मुले आणि पालक यांच्यात घट्ट नाते निर्माण होणे अत्यावश्यक असते. जर तुम्हीही पालक असाल तर मुलाशी घट्ट नातं निर्माण करण्याचा पाया अगदी सुरुवातीपासूनच घातला पाहिजे. मुलाला समजून घ्या, त्याच्यासोबत अधिकाधिक वेळ घालवा आणि त्यांच्यासाठी सुरक्षित वातावरण तयार करा. जाणून घेऊ या अशा काही बाबी ज्यामुळे तुमचे आणि तुमच्या मुलांचे नाते घट्ट होऊ शकते.
तुमचं प्रेम व्यक्त करा : निरोगी आणि चांगल्या नात्यासाठी जीवनाच्या प्रत्येक टप्प्यावर एकमेकांवर प्रेम व्यक्त करणं आवश्यक आहे. तुमच्या बाळाला मिठी मारा, त्याला प्रेमाने सांभाळा म्हणजे त्याला समजेल की तुमच्या आणि त्याच्यामधलं नातं खास आहे. जेव्हा तुम्ही तुमच्या मुलांशी बोलता, तेव्हा त्यांच्याशी जवळीक साधण्याचा आणि त्यांच्याशी मैत्री करण्याचा प्रयत्न करा. त्यांना प्रेमळ वागणूक देऊन मोकळेपणाने व्यक्त होण्यासाठी प्रोत्साहित करा.
तुमचे त्यांच्यावर किती प्रेम आहे हे सांगत राहा : प्रत्येक पालकाचे आपल्या मुलांवर अपार प्रेम असते, हे उघड आहे. पण हे त्यांनी आपल्या मुलांना सांगितले नाही तर त्यांना कळणार कसे? त्यांचे वय कितीही असो. फक्त त्यांना वरचेवर सांगत राहा की, तुमचे त्यांच्यावर खूप प्रेम आहे. यामुळे तुमचे आणि तुमच्या मुलाचे नाते दीर्घकाळ घट्ट राहील.
मर्यादा सेट करा आणि नियम बनवा : जसजसे मुल मोठे होते आणि त्यांच्या सभोवतालच्या जगाबद्दल शिकतं, त्यांना मार्गदर्शनाची आवश्यकता वाढत जाते. त्यामुळे तुमच्या मुलांकडून तुम्हाला काय अपेक्षा आहेत, याबद्दल बोला. जेव्हा नियम मोडले जातात तेव्हा योग्य परिणाम होतील याची कल्पना द्या, जेणेकरून नियम मोडले जातात तेव्हा काय होऊ शकते, हे मुलांना कळेल.
ऐका आणि मुलांप्रति सहानुभूती दाखवा : जर तुम्ही चांगले श्रोते असाल तर तुमचे सर्वांशी चांगले संबंध राहतील. मुलांच्या बाबतीतही असंच आहे. त्यांच्या भावना समजून घेण्यासाठी त्यांचे ऐकणे आणि त्यांना समजून घेणे महत्त्वाचे आहे. त्यांना कळू द्या की, तुम्ही त्यांच्या मदतीसाठी सदैव असाल. तुमच्या मुलाच्या दृष्टिकोनातून गोष्टी पाहण्याचा प्रयत्न करा. असं केल्याने तुमचं आणि तुमच्या मुलाचे नाते अधिक घट्ट होईल.
एकत्र खेळा : मुलांच्या विकासासाठी खेळ खूप महत्वाचे आहेत. खेळांमुळे त्यांच्यातली निर्णयक्षमता वाढते. ते भावना व्यक्त करण्यास शिकतात. सर्जनशीलता वाढते. तसंच विविध खेळांच्या मदतीने तुम्ही तुमच्या मुलाशी तुमचे नाते सुधारू शकता.
मुलांसाठी उपलब्ध व्हा : दररोज किमान १०-१५ मिनिटे तुमच्या मुलाशी बोला. या काळात लक्ष विचलित करू नका. टीव्ही बंद करा, सेलफोन बाजूला ठेवा आणि मुलांसोबत उपयुक्त वेळ व्यतित करा.
एकत्र जेवा : एकत्र खाल्ल्याने भरपूर संभाषण होऊ शकतं आणि तुम्हाला तुमच्या मुलासोबतचे तुमचे नाते मजबूत करण्याची संधी मिळते. जेवताना सेलफोन आणि इतर इलेक्ट्रॉनिक उपकरणे दूर ठेवा. मुलांना आरोग्य आणि सकस आहाराचे महत्त्व समजावून सांगा. त्यांच्या मानसिक आरोग्यावरही त्याचा कसा परिणाम होतो, ते सांगा.