मुंबई | – : महाराष्ट्रातील लाखो शाळा व महाविद्यालयीन विद्यार्थ्यांसाठी एक अत्यंत दिलासादायक निर्णय घेण्यात आला आहे. परिवहन मंत्री प्रताप सरनाईक यांच्या पुढाकाराने राज्यात “एसटी पास थेट तुमच्या शाळेत” ही अभिनव योजना आजपासून सुरू करण्यात आली आहे.
या निर्णयामुळे आता विद्यार्थ्यांना एसटी आगारात जाऊन पाससाठी रांगेत उभं राहावं लागणार नाही. शाळा व महाविद्यालयांच्या समन्वयातून विद्यार्थ्यांची यादी तयार करण्यात येणार असून, एसटी आगार व्यवस्थापकांकडून हे पास थेट शाळांमध्ये वितरित केले जाणार आहेत.
🎓 विद्यार्थ्यांसाठी ६६.६६% सवलत, तर विद्यार्थिनींसाठी प्रवास पूर्णतः मोफत!
राज्य सरकार विद्यार्थ्यांना एसटी बस प्रवासासाठी ६६.६६% इतकी भरीव सवलत देत असून, यामुळे त्यांना मासिक पासासाठी केवळ ३३.३३% रक्कम भरावी लागते.
विशेषतः, ‘पुण्यश्लोक अहिल्याबाई होळकर योजना’ अंतर्गत इयत्ता बारावीपर्यंतच्या सर्व विद्यार्थिनींसाठी एसटी प्रवास मोफत करण्यात आला आहे.
📋 शाळांनी तयार करायची आहे विद्यार्थ्यांची यादी
एसटी बस पास वितरणासाठी प्रत्येक शाळेला मुख्याध्यापक किंवा प्राचार्य यांच्या माध्यमातून विद्यार्थ्यांची यादी तयार करण्याच्या सूचना देण्यात आल्या आहेत.
ही यादी स्थानिक एसटी आगार व्यवस्थापकांकडे पाठवण्यात येईल. त्यानंतर आगारातून थेट शाळांमध्ये जाऊन पासचे वितरण करण्यात येईल.
✅ योजनेचे फायदे :
- रांगेत उभं राहण्याची गरज नाही
- वेळ आणि खर्चाची बचत
- विद्यार्थिनींसाठी मोफत सेवा
- शाळा स्तरावरच सोपी व सुलभ प्रक्रिया
या उपक्रमामुळे शैक्षणिक वर्षाच्या सुरुवातीलाच लाखो विद्यार्थ्यांना दिलासा मिळणार आहे. राज्य शासनाच्या या निर्णयाचे सर्वत्र स्वागत होत असून, हा उपक्रम “डिजिटल व सुलभ शिक्षण वाहतुकीच्या” दिशेने एक महत्त्वपूर्ण पाऊल ठरणार आहे.
