पुणे- पुण्यातील फर्ग्युसन कॉलेज रोडवर वाहतूक नियमांचे उल्लंघन करणाऱ्यांवर नजर ठेवण्यासाठी कृत्रिम बुद्धिमत्ता (AI) आधारित कॅमेरे बसविण्यात आले आहेत. या प्रकल्पाचे उद्घाटन पोलीस आयुक्त अमितेश कुमार यांच्या हस्ते करण्यात आले. या प्रणालीद्वारे चुकीच्या दिशेने वाहन चालवणे, हेल्मेट न घालणे, सिग्नल तोडणे, ओव्हरस्पीडिंग, लेन कटिंग, नो-पार्किंग झोनमध्ये पार्किंग, डबल पार्किंग, आणि ट्रॅफिकमध्ये अडथळा निर्माण करणे यांसारख्या उल्लंघनांवर अचूक नजर ठेवली जाते. नियम मोडल्यास दंडाची पावती थेट ई-मेल किंवा चालान पोर्टलवर पाठवली जाते.
या प्रकल्पाच्या पहिल्या दिवशीच AI कॅमेऱ्यांनी २०० वाहतूक उल्लंघनांची नोंद केली आणि संबंधित वाहनचालकांना ई-चालान पाठवले. या प्रणालीमुळे पोलिस आणि वाहनचालकांमधील वाद टाळण्यास मदत होईल, असे पोलीस आयुक्तांनी सांगितले. या प्रकल्पात सहा AI कॅमेरे आणि डिजिटल स्क्रीन बसविण्यात आले आहेत. वाहनचालकांना त्यांच्या उल्लंघनाची माहिती स्क्रीनवर दिसेल आणि काही मिनिटांत दुरुस्ती न केल्यास चालान जारी केला जाईल.
हा प्रकल्प सध्या फर्ग्युसन रोडवर प्रायोगिक तत्वावर सुरू असून, लवकरच जे.एम. रोड, एम.जी. रोड, बाजीराव रोड, शिवाजी रोड आणि विमानतळ रोडवरही ही प्रणाली लागू करण्यात येणार आहे. या प्रणालीमुळे वाहतूक नियंत्रण अधिक प्रभावी होईल आणि नागरिकांनी नियमांचे पालन करण्यास प्रवृत्त केले जाईल.
पुणे पोलिसांनी नागरिकांना सहकार्य करण्याचे आवाहन केले आहे आणि वाहन चालवताना नियमांचे पालन करण्याची विनंती केली आहे. AI प्रणालीमुळे कोणत्याही प्रकारची माफी शक्य नाही, कारण सर्व कारवाई पूर्णतः ऑटोमेटेड आहे. त्यामुळे नागरिकांनी जबाबदारीने वाहन चालवणे आवश्यक आहे.
