मुंबई :
मराठी चित्रपटसृष्टीत पहिल्यांदाच एका ट्रेलर लाँचला असा अनोखा आणि थरारक अंदाज पाहायला मिळाला. अंकुश चौधरी अभिनीत ‘पी.एस.आय. अर्जुन’ या ॲक्शन-थ्रिलर चित्रपटाचा भव्य ट्रेलर नुकताच नवापूर पोलीस स्टेशनच्या रिक्रिएटेड सेटवर, थेट जेलच्या वातावरणात लाँच करण्यात आला. ही खास ट्रेलर लाँच सोहळ्याची कल्पना निर्माता विक्रम शंकर यांनी प्रत्यक्षात उतरवली असून, तिची प्रचंड चर्चा सध्या सर्वत्र पाहायला मिळतेय.
🔥 अंकुशची दमदार एन्ट्री आणि पोलिसांची साथ
अंकुश चौधरीला चित्रपटातील पोलीस अधिकारी बेड्या ठोकून जेलमध्ये घेऊन येतात आणि तिथे त्याची एन्ट्री होते – प्रेक्षकांच्या टाळ्यांचा गजर होतो. अशा थरारक पद्धतीने लाँच झालेल्या ट्रेलरमध्ये अंकुशचा डॅशिंग वर्दीतील लूक, तीव्र डायलॉग्स आणि जबरदस्त ॲक्शन सीन्स हे स्पष्टपणे उठून दिसतात. त्याची व्यक्तिरेखा पोलिसाची की गुन्हेगाराची? हा संभ्रम जाणून घेण्यासाठी प्रेक्षकांना चित्रपट पाहावा लागणार आहे.
🎥 ट्रेलरमधून प्रेक्षकांमध्ये वाढलेली उत्सुकता
चित्रपटाचा ट्रेलर रहस्य, ॲक्शन, सस्पेन्स आणि नाट्यमयतेने भरलेला आहे. प्रेक्षकांनी याला प्रचंड प्रतिसाद दिला असून, गाणी आणि डायलॉग्स सोशल मीडियावर व्हायरल होत आहेत.
🎬 दिग्दर्शक भूषण पटेल यांची खास टिप्पणी
“मराठी प्रेक्षकांसाठी वेगळा आणि दर्जेदार सिनेमा बनवण्याची इच्छा होती. ‘पी.एस.आय. अर्जुन’ म्हणजे ॲक्शन, थ्रिल आणि फॅमिली ड्रामाचं परिपूर्ण पॅकेज आहे,” असे दिग्दर्शक भूषण पटेल यांनी सांगितले.
💬 निर्माता विक्रम शंकर यांचा ट्रेलर लाँचबाबत हटके दृष्टिकोन
“चित्रपट पोलिसांवर आधारित असल्याने ट्रेलर लाँच जेलमध्ये करण्याची कल्पना आम्ही प्रत्यक्षात उतरवली आणि ती प्रेक्षकांना प्रचंड आवडली,” असे त्यांनी नमूद केले.
👥 तगडी स्टारकास्ट आणि अनुभवी टीम
या चित्रपटात अंकुश चौधरीसोबत किशोर कदम, नंदू माधव, अक्षया हिंदळकर, कमलाकर सातपुते यांसारखे अनुभवी कलाकार सहभागी आहेत. चित्रपटाला बॉलिवूडमधील थ्रिलर सिनेमा बनवणाऱ्या दिग्दर्शकाची साथ मिळाली असून, संगीत नकाश अजीज यांनी दिलं आहे.
