पंढरपूर,- श्री विठ्ठल-रुक्मिणी मंदिर समितीने दि. १५ जूनपासून भाविकांसाठी जलद आणि नियोजनबद्ध दर्शन सोयीसाठी टोकन दर्शन प्रणाली लागू केली आहे. मात्र, दि. २४ जून रोजी या प्रणालीचा गैरवापर करून बोगस पास घेऊन दर्शन रांगेत प्रवेश करणाऱ्यांवर कडक कारवाई केली जाणार असल्याची माहिती मंदिर समितीचे कार्यकारी अधिकारी राजेंद्र शेळके यांनी दिली.
हिंगोली जिल्ह्यातील पार्वतीबाई बापूराव बेले, लक्ष्मीबाई केशवराव बळे, संध्या मारूतीराव सातपुते, अरूणा विठ्ठलराव सातपुते, सुधाकर रामचंद्र भालेराव आणि केशव गणपतराव हरबळे या सहा व्यक्तींनी बोगस पास तयार करून दर्शन रांगेच्या प्रवेशद्वारापर्यंत पोहोचण्याचा प्रयत्न केला. मात्र, सुरक्षा अधिकाऱ्यांनी सतर्कता बाळगून पासेसची तपासणी केली असता ते बनावट असल्याचे स्पष्ट झाले. त्यानंतर सर्वांना पंढरपूर शहर पोलीस ठाण्याच्या ताब्यात देण्यात आले असून त्यांच्यावर आवश्यक ती कायदेशीर कार्यवाही सुरू आहे.
मंदिर समितीने अधिकृत संकेतस्थळ www.vitthalrukminimandir.org वरून मोफत टोकन पास उपलब्ध करून देण्याची सुविधा सुरू केली असून त्याला भाविकांचा सकारात्मक प्रतिसाद मिळत आहे. दर्शन प्रक्रियेत पारदर्शकता व सुलभता येण्यासाठी ही टोकन प्रणाली अत्यंत उपयुक्त ठरत आहे, असेही श्री. शेळके यांनी सांगितले.
व्यवस्थापक मनोज श्रोत्री यांनी स्पष्ट केले की, टोकन पास पूर्णपणे निशुल्क असून कोणत्याही मध्यस्थामार्फत किंवा एजंटमार्फत त्याचे बुकींग करू नये. फसवणुकीच्या प्रकारांपासून बचाव करण्यासाठी भाविकांनी केवळ मंदिर समितीच्या अधिकृत संकेतस्थळावरूनच टोकन बुकिंग करावे, असे आवाहन त्यांनी केले.
याप्रकारामुळे मंदिर प्रशासन अधिक सजग झाल्याचे चित्र दिसून येत आहे. यापुढे अशा प्रकारचे बोगस पास प्रकरण रोखण्यासाठी तपासणी अधिक कडक करण्यात येईल आणि दोषींवर कठोर कारवाई केली जाईल, असा इशारा देखील प्रशासनाने दिला आहे.
महत्वाचे मुद्दे (बॉक्स स्वरूपात छापण्यासाठी):
- दर्शनासाठी टोकन पास प्रणाली १५ जूनपासून सुरू
- टोकन पास मिळवण्यासाठी अधिकृत संकेतस्थळ: www.vitthalrukminimandir.org
- पास पूर्णपणे मोफत, कोणत्याही एजंटाकडून खरेदी करू नये
- बोगस पास प्रकरणात हिंगोलीच्या ६ भाविकांवर कारवाई सुरू
- दर्शन रांगेत प्रवेश करताना कडक तपासणी
