समाजिक काम हे प्रातिनिधिक नसावे, तर सर्वसमावेशक आणि अमर्याद असावे, अशी भावना राज्याचे उच्च व तंत्रशिशण मंत्री चंद्रकांतदादा पाटील यांनी व्यक्त केली. तसेच, सामाजिक कामासाठी समाजातील अनेक दानशूर व्यक्ती सढळ हाताने मदत करण्यास तत्पर असतात, असेही त्यांनी यावेळी नमूद केले.
उच्च व तंत्र शिक्षण मंत्री आणि कोथरुडचे आमदार चंद्रकांतदादा पाटील यांच्या पुढाकारातून आणि भारत विकास परिषद, मिशिलिन, इंडो फ्रेंच चेंबर ॲाफ कॅामर्स, फ्यूप्रो ( टीव्ही शो शार्क टॅंकमध्ये भाग घेणारी आणि उत्कृष्ट स्टार्टअपसाठी भांडवल मिळालेली कंपनी), समुत्कर्ष सोशल फाऊंडेशन आणि तार्क फाऊंडेशनच्या संयुक्त संयोजनातून कोथरुड मध्ये दिव्यांग सेवा सहय्यता अभियान राबविण्यात येत असून, या उपक्रमाचा शुभारंभ ना. चंद्रकांतदादा पाटील आणि महापालिका आयुक्त नवल किशोर राम यांच्या उपस्थितीत झाला.
यावेळी भारत विकास परिषदेचे दत्ताजी चितळे, राजेंद्र जोग, सुनील लोढा, निमिष मिश्रा, लक्षणा सक्सेना, माजी नगरसेवक दीपक पोटे, नगरसेविका माधुरी सहस्रबुद्धे, वृषाली चौधरी, पुणे जिल्हा नियोजन समिती डॉ. संदीप बुटाला, भाजप कोथरुड दक्षिण मंडल अध्यक्ष कुलदीप सावळेकर, पुणे शहर चिटणीस प्रा. अनुराधा एडके, गायत्री लांडे, ॲड. प्राची बगाटे, अपर्णा लोणारे यांच्यासह इतर मान्यवर उपस्थित होते.
ना. चंद्रकांतदादा पाटील म्हणाले की, कोथरुड मधील दिव्यांगांच्या सक्षमीकरणासाठी माझ्या जनसंपर्क कार्यालयाच्या माध्यमातून अनेक उपक्रम सुरु आहेत. पण दिव्यांगांना अजून सक्षम करुन स्वत: च्या पायावर उभे करण्यासाठी सदर उपक्रमाचा प्रस्ताव माझ्या समोर आला, तेव्हा त्याला तात्काळ मान्यता देऊन सुरुवात केली. कारण सामाजिक काम हे केवळ प्रातिनिधिक नसावे, तर सर्व समावेशक, समाजाची गरज ओळखून आणि अमर्याद स्वरूपाचे असले पाहिजे. त्यामुळे ह्या उपक्रमाची व्याप्ती भविष्यात वाढली पाहिजे, अशी भावना व्यक्त करतानाच, सामाजिक कामासाठी समाजातील अनेक दानशूर व्यक्ती सढळ हाताने मदत करण्यास तत्पर असतात असेही त्यांनी यावेळी नमूद केली.
ते पुढे म्हणाले की, खानदेशात यजुवेंद्र महाजन सारखा तरुण दिव्यांगांसाठी आपले संपूर्ण आयुष्य झोकून देऊन काम करतो. दिव्यांगांमधील न्यूनगंड बाजूला करुन त्यांना प्रशिक्षण देऊन स्पर्धा परिक्षांमध्ये सहभागी होण्यासाठी प्रोत्साहित करतो. त्याच्या याच प्रयत्नातून आज असंख्य दिव्यांग तरुण-तरुणी एमपीएससी-यूपीएससी सारख्या स्पर्धा परीक्षेत घवघवीत यश संपादन करुन प्रशासकीय सेवेच्या माध्यमातून देशसेवा करत आहेत. त्याचे हे काम आता पुण्यातही सुरु झाले असून, इथेही त्याला प्रतिसाद चांगला मिळत आहे.
महापालिका आयुक्त नवल किशोर राम म्हणाले की, दिव्यांगांना सहानुभूतीची आवश्यकता नाही. अनेक वैज्ञानिकांनी आपल्या दिव्यांगत्वावर मात करून जगाला मोठमोठी संशोधने दिले. स्टीफन हॅाकिग्स हे सर्वांना माहिती आहेत. त्यामुळे दिव्यांगांना सहानुभूती नव्हे, तर प्रोत्साहन देण्याची आवश्यकता असतो. दिव्यांग खेळाडूंना प्रोत्साहन देण्यासाठी ३ डिसेंबर साठी महापालिकेच्या वतीने विविध स्पर्धांचे आयोजन केले आहे. यामध्ये सर्वांनी सहभागी व्हावे, असे आवाहन केले.
यावेळी भारत विकास परिषदेचे दत्ताभाऊ चितळे, निमिष मिश्रा, लक्षणा सक्सेना यांनीही आपल्या भावना व्यक्त केल्या.
