पुणे, :“गायन हा एक सतत बदलणारा प्रवास आहे. काळानुरूप होणारे बदल गायक आणि कलाकारांनी उघड्या मनाने स्वीकारले पाहिजेत. आजच्या तरुण पिढीकडून शिकण्यासाठी मी आलो आहे. कराओकेच्या युगात नवोदित गायकांना वाद्यवृंदासह सादरीकरणाची संधी देणारे व्यासपीठ उपलब्ध करून देणे ही मोठी गोष्ट आहे,” अशा शब्दांत प्रसिद्ध गायक पं. अजय पोहनकर यांनी पुणे आयडॉल २०२५ या राज्यस्तरीय गायन स्पर्धेच्या उद्घाटनप्रसंगी मार्गदर्शन केले.
सोमेश्वर फाउंडेशनच्या वतीने माजी आमदार स्व. विनायक निम्हण यांच्या स्मरणार्थ आयोजित करण्यात येणाऱ्या पुणे आयडॉल स्पर्धेचे उद्घाटन पं. भीमसेन जोशी सभागृह, औंध येथे पार पडले. यावेळी मंचावर गायिका सावनी रवींद्र, सोमेश्वर फाउंडेशनचे अध्यक्ष व माजी नगरसेवक सनी विनायक निम्हण, स्वातीताई निम्हण, नंदकुमार वाळुंज, बिपिन मोदी, ज्ञानेश्वर मुरकुटे हे मान्यवर उपस्थित होते.
🎤 गायनात बदल अनिवार्य – पोहनकरांचा सल्ला
पुढे बोलताना पं. अजय पोहनकर म्हणाले,
“जशी जुन्या वास्तूंऐवजी उंच इमारती उभ्या राहिल्या आहेत, तशीच गायकीची शैलीही बदलली आहे. भावना तीच राहते, पण त्याचे स्वरूप बदलते. त्यामुळे जुना कालखंड मनात ठेवत नव्या प्रयोगांकडे खुल्या मनाने पाहायला हवे.”
युवक स्पर्धकांना मार्गदर्शन करताना ते म्हणाले,
“श्रवण हा गायकाच्या प्रगतीचा आत्मा आहे. जितके ऐकाल, तितके गाण्यात घडाल. स्पर्धा ही दुय्यम गोष्ट आहे – खरी महत्त्वाची गोष्ट म्हणजे प्रामाणिक गाणं!
🌟 सातत्य आणि व्यासपीठाचं महत्त्व – सावनी रवींद्र
सावनी रवींद्र म्हणाल्या,
“एखादी स्पर्धा सुरू करणे सोपे असते, पण तिचे सातत्य राखणे खूप कठीण आहे. सोमेश्वर फाउंडेशनने गेल्या २३ वर्षांत हे साध्य केले आहे. मला बालपणापासून या व्यासपीठावर येण्याची इच्छा होती. आज ती पूर्ण झाली, हे माझं भाग्य आहे.”
🎶 संस्कृती संवर्धनासाठी २३ वर्षांची परंपरा – सनी निम्हण
कार्यक्रमाच्या प्रारंभी सनी विनायक निम्हण यांनी सांगितले,
“अन्न, वस्त्र, निवाऱ्यासोबतच कला, क्रीडा आणि संस्कृती जोपासली, तरच समाज समृद्ध होतो. त्यामुळेच सोमेश्वर फाउंडेशन २३ वर्षांपासून पुणे आयडॉलसारख्या उपक्रमांतून नवोदित गायकांना व्यासपीठ उपलब्ध करून देत आहे.”
🏆 महाअंतिम फेरी आणि विशेष कार्यक्रमाची घोषणा
पुणे आयडॉल स्पर्धा चार वयोगटांमध्ये पार पडते. यावर्षीची महाअंतिम फेरी
📅 शनिवार, २४ मे २०२५ रोजी
🕛 दुपारी १२ ते ३ या वेळेत
📍 बालगंधर्व रंगमंदिर, पुणे येथे पार पडणार आहे.
त्यानंतर जितेंद्र भुरुक प्रस्तुत ‘गीतों का सफर’ या भव्य सांगीतिक कार्यक्रमाने स्पर्धेची सांगता होणार आहे.
👏 कार्यकर्त्यांची मेहनत आणि परीक्षण मंडळ
या स्पर्धेच्या यशस्वी आयोजनासाठी अमित मुरकुटे, हेमंत कांबळे, अनिकेत कपोते, वनमाला कांबळे, संजय माजिरे, गणेश शेलार, संजय तरडे या कार्यकर्त्यांनी विशेष मेहनत घेतली आहे.
स्पर्धेचे परीक्षण जितेंद्र भुरुक व मुग्धा वैशंपायन करत आहेत.
सूत्रसंचालन मिलिंद कुलकर्णी आणि महेश गायकवाड यांनी केले.
आभार प्रदर्शन उमेश वाघ यांनी केले.
