देहू- देहू नगरी आज पुन्हा एकदा भक्तीरसात न्हालेली होती… टाळ, मृदुंगाच्या तालांवर थिरकणारे पाय, ‘ग्यानबा तुकाराम’च्या गजरात तल्लीन झालेले वारकरी, डोक्यावर तुळशी वृंदावन आणि हाती दिंड्या पताका घेऊन माऊलीच्या पावलांना साथ देणारा महासागर…
या महासागराच्या साक्षीने, महाराष्ट्राचे मुख्यमंत्री देवेंद्र फडणवीस यांनी संत तुकाराम महाराजांच्या पवित्र पादुकांचे दर्शन घेत भक्तिभावाने विधीवत पूजन केलं. श्री विठ्ठल-रखुमाई व शिळा मंदिरात झालेल्या या पूजनाने संपूर्ण वातावरण भारावून गेलं. जणू संपूर्ण राज्यच त्या क्षणी पंढरीकडे प्रस्थान करत होतं.
वारकऱ्यांच्या मनात होता केवळ एक भाव — “वारी सोडू नको रे माउली…”
मुख्यमंत्र्यांची उपस्थिती हे केवळ औपचारिक नव्हतं, तर तेही त्या आध्यात्मिक ओढीचे एक घटक बनले होते.
जगद्गुरु संत तुकाराम महाराज संस्थानच्या मंदिरात झालेल्या आरतीनंतर पालखीचा मोहिमेचा पहिला टप्पा — इनामदार वाड्याकडे प्रस्थान — हे अगदी पारंपरिक व भक्तिभावपूर्ण पद्धतीने पार पडले.
पंढरीच्या दिशेने निघालेली ही वारी म्हणजे चालतीफिरती भक्तीची परंपरा.
जिच्या पावलांमध्ये श्रद्धा आहे… आणि प्रत्येक घोषामध्ये उर्जेचा हुंकार!
मुख्यमंत्री देवेंद्र फडणवीस यांनी आज श्री क्षेत्र देहू येथील जगद्गुरु श्री संत तुकाराम महाराज संस्थान मंदिरात श्री विठ्ठल रखुमाई मंदिर आणि श्री संत तुकाराम महाराज शिळा मंदिर आणि श्रीराम मंदिरात दर्शन घेतले. त्यांच्या हस्ते मंदिरात श्री गणेश पूजन, कलश पूजन,पाद्य पूजन करून पालखीची विधिवत प्रस्थान पूजा व आरती झाली.
टाळ-मृदुंगाच्या तालावर भक्तिरसात तल्लीन वारकरी…. ‘ग्यानबा तुकाराम’, ‘माऊली, माऊली’ चा गजर…. डोक्यावर तुळशी वृंदावन, हाती दिंड्या-पताका घेतलेले वारकरी…अशा भक्तिमय वातावरणात देहू येथून आषाढी वारीसाठी श्री संत तुकाराम महाराज पालखी सोहळ्याने मुख्यमंत्री श्री.फडणवीस यांच्या उपस्थितीत आज पंढरपूरकडे प्रस्थान ठेवले. पंढरीच्या वारीसाठी मोठ्या संख्येने वारकरी देहू नगरीत दाखल झाले होते.
यावेळी केंद्रीय राज्यमंत्री मुरलीधर मोहोळ, खासदार श्रीमती सुनेत्राताई पवार, खासदार श्रीरंग बारणे,आमदार सुनील शेळके, आमदार विजय शिवतारे, आमदार अमित गोरखे, आमदार उमा खापरे,आमदार शंकर मांडेकर, विभागीय आयुक्त डॉ चंद्रकांत पुलकुंडवार, जिल्हाधिकारी जितेंद्र डुडी, श्री संत तुकाराम महाराज संस्थानचे अध्यक्ष ह.भ.प. जालिंदर मोरे, पालखी सोहळा प्रमुख ह.भ.प. गणेश महाराज मोरे, ह.भ.प वैभव महाराज मोरे, ह.भ.प दिलीप महाराज मोरे, विश्वस्त ह.भ.प. विक्रमसिंह मोरे, ह.भ.प.उमेश महाराज मोरे, ह.भ.प. लक्ष्मण महाराज मोरे आदी उपस्थित होते.
दर्शन व पूजेनंतर मुख्यमंत्री श्री. फडणवीस यांनी उपस्थिती वारकरी माऊलींना वंदन केले. मंदिर संस्थानच्यावतीने त्यांचा सत्कार करण्यात आला. यावेळी मुख्यमंत्र्यांनी संस्थानच्या विश्वस्तांशी चर्चा केली.
महापुजेनंतर पालखीने इनामदार वाड्यातील मुक्कामाकडे प्रस्थान केले.
