छत्रपती संभाजीनगर, – : महाराष्ट्रात आरोग्य क्षेत्रात नवे युग सुरू करत, मुख्यमंत्री देवेंद्र फडणवीस यांनी जाहीर केले की येत्या तीन ते चार वर्षांत राज्यात त्रिस्तरीय आरोग्य सेवा यंत्रणा उभारली जाणार आहे. प्रत्येक नागरिकाला त्याच्या घराजवळ — केवळ ३ ते ५ किलोमीटर अंतरावर — गुणात्मक आरोग्य सेवा उपलब्ध होणार आहे.
या नव्या मॉडेलच्या माध्यमातून सर्वसामान्य माणसाला तत्पर व दर्जेदार वैद्यकीय सेवा मिळण्याचा मार्ग मोकळा होणार आहे.
ट्रू बीम किरणोपचार प्रणालीचे लोकार्पण
शासकीय कर्करोग रुग्णालयात अत्याधुनिक “ट्रू बीम” किरणोपचार प्रणाली आणि विस्तारीत उपचार केंद्राचे लोकार्पण मुख्यमंत्री देवेंद्र फडणवीस व केंद्रीय आरोग्य मंत्री जे.पी. नड्डा यांच्या हस्ते पार पडले.
या सोहळ्याला महसूल मंत्री चंद्रशेखर बावनकुळे, वैद्यकीय शिक्षण मंत्री हसन मुश्रीफ, विरोधी पक्षनेते अंबादास दानवे व अनेक मान्यवर उपस्थित होते.
कर्करोग उपचारांची नवी दिशा
मुख्यमंत्री फडणवीस म्हणाले, “छत्रपती संभाजीनगरमध्ये (TrueBeam Radiation Therapy Maharashtra) ट्रू बीम तंत्रज्ञानामुळे रुग्णांना नेमकेपणाने रेडिएशन थेरपी मिळेल. यापूर्वी रुग्णांना मुंबईच्या टाटा मेमोरियल हॉस्पिटलमध्ये जावे लागायचे, परंतु आता मराठवाडा व आसपासच्या जिल्ह्यांतील रुग्णांसाठी अत्याधुनिक सेवा सहज उपलब्ध आहे.”
राज्यात पेट सिटी स्कॅनर सुविधा मंजूर झाल्याचेही त्यांनी जाहीर केले, ज्यामुळे कर्करोगाचे अचूक व लवकर निदान शक्य होईल.
भारताची जागतिक स्तरावर दखल
केंद्रीय मंत्री जेपी नड्डा यांनी नमूद केले की भारतात आरोग्य सेवा अधिक गतिमान झाल्या आहेत. कर्करोगासारख्या गंभीर आजारासाठी ३० दिवसांत उपचार सुरू होण्याचे प्रमाण ९० टक्क्यांपर्यंत पोहोचले आहे, आणि याची दखल जागतिक स्तरावर घेतली जात आहे.
राज्य शासनाची पुढील दिशा
कर्करोग प्रतिबंधासाठी आणि जनजागृतीसाठी राज्य शासन विविध तपासणी शिबिरांचे आयोजन करणार आहे. लवकर निदान व प्रतिबंधात्मक उपाययोजनांना प्राधान्य देऊन, आरोग्य सेवा क्षेत्रात मोठा बदल घडवण्याचा निर्धार मुख्यमंत्री फडणवीस यांनी व्यक्त केला.
