पुणे- पुण्यातील हडपसर येथील हरी ओम कॉलनीत श्री विश्वकर्मा सह भोजलिंग काका दिंडीचे मोठ्या उत्साहात आणि भक्तिभावाने स्वागत करण्यात आले. टाळ-मृदंगाच्या गजरात, ‘ज्ञानोबा माऊली’, ‘माऊली माऊली’च्या जयघोषात आणि डोक्यावर तुळशी वृंदावन, हाती दिंड्या-पताका घेऊन आलेल्या वारकऱ्यांनी परिसरात भक्तिरसाची उधळण केली.
दिंडीचे स्वागत झाल्यानंतर कॉलनीतील बापू जयसिंग गायकवाड यांच्या ‘माऊली’ निवासस्थानी वारकऱ्यांनी विसावा घेतला. सकाळच्या नाश्त्याची व्यवस्था बाजीराव चौरे, दीपक गाडेकर, सचिन वाघ यांनी केली. दुपारच्या जेवणाची जबाबदारी गोरख उदमले, गोड शिरा कावरे साहेब, तर रात्रीच्या जेवणाची व्यवस्था बापू गायकवाड, गोड खीर वाघ साहेब यांच्या वतीने करण्यात आली. सायंकाळी हरिपाठ आणि हभप गोरक्षनाथ सखाराम सुतार महाराज यांचे कीर्तन झाले. त्यामुळे संपूर्ण कॉलनी भक्तिमय वातावरणात न्हालेली दिसली.
दुसऱ्या दिवशी सकाळी काकडा आरतीनंतर एकादशी निमित्त वारकऱ्यांसाठी साबुदाणा खिचडी वाबळे सर, कुंभारकर साहेब, मेमाणे साहेब यांनी तर भगरीचा भात शिवसेना विभागप्रमुख शैलेंद्र चव्हाण यांच्या वतीने देण्यात आला. चहाची सोय स्वप्नील लखमदे, अशोक भोई यांनी केली, तर भाजीपाला पांडुरंग भिषे यांनी दिला. या सर्व सेवेमुळे दिंडीतील वारकऱ्यांना उत्तम सुविधा मिळाल्या.
दिंडीचे मालक गोरक्षनाथ सुतार महाराज हे गेल्या १६ वर्षांपासून या दिंडीचे उत्कृष्ट नियोजन करत असून, वारकऱ्यांची सर्वतोपरी काळजी घेतात. भानोबा केटरिंगचे संदीप गायकवाड आणि बापू गायकवाड यांनीही परिसरातील नागरिकांचे आभार मानले.
या दोन दिवसांच्या सोहळ्यात हरी ओम कॉलनी भक्तिमय वातावरणाने न्हालेली होती. वारकऱ्यांच्या सेवेसाठी सर्वांनी एकत्र येऊन केलेले प्रयत्न आणि प्रेम, हा या सोहळ्याचा खरा गाभा ठरला.
