पुणे-
आमदार माधुरी मिसाळ या माझ्या विधिमंडळातील जुन्या सहकारी आहेत. त्यांचा विविध नागरी प्रश्नांसंदर्भात सखोल अभ्यास आहे. विविध विकासकामांचा प्रशासनाकडे सातत्याने पाठपुरावा करण्याची त्यांची हातोटी वाखाणण्याजोगी आहे. प्रशासनावर त्यांचा चांगला अंकुश आहे. त्यांचा अनुभव आणि अभ्यासामुळे विधानसभेतील प्रतोद अशी महत्त्वाची जबाबदारी त्यांच्यावर सोपविण्यात आली. पर्वती मतदारसंघात त्यांच्यामुळे मोठे विकास प्रकल्प उभे राहू शकले. राज्यातील शहरी मतदारसंघासाठी त्यांनी पर्वतीमध्ये केलेला विकास अनुकरणीय आहे ,त्यामुळेच माधुरीताई चौथ्यांदा विक्रमी मताधिक्याने पर्वती मतदारसंघातून विजयी होतील असा विश्वास भाजपच्या राष्ट्रीय चिटणीस आमदार पंकजा मुंडे यांनी मंगळवारी व्यक्त केला.
आमदार माधुरी सतीश मिसाळ यांच्या प्रचारार्थ जनता वसाहत येथे पंकजा मुंडे यांच्या प्रमुख उपस्थितीत पदयात्रेचे आयोजन करण्यात आले. शहराध्यक्ष धीरज घाटे, दीपक मिसाळ, श्रीकांत पुजारी, अनिता कदम, आनंद रिठे, संतोष कदम, राजू कदम, सुनील बिबवे, विश्वास ननावरे, विनया बहुलीकर, महेंद्र गावडे, दैविक विचारे, श्रुती नाझिरकर, महेश बाटले, अक्षय वायाळ, बुवागिरी जीवन माने, सुधीर कुरुमकर, सुजित सामदेकर, बंडू सकपाळ, विशाल डहाळे, अमर हिंगमिरे यांची प्रमुख उपस्थिती होती.
पंकजा मुंडे म्हणाल्या, “राज्यामध्ये महायुतीसाठी पोषक वातावरण असून महायुतीमधील सर्व पदाधिकारी ,कार्यकर्ते एकजुटीने प्रचारात सक्रिय झालेले आहेत. त्यामुळे राज्यात पुन्हा एकदा महायुतीची सत्ता येईल. महायुतीतील सर्व पक्षात चांगल्या प्रकारे समन्वय असल्याने बंडखोरी देखील रोखण्यात आम्हाला यश आले आहे. पुणे जिल्ह्यात 21 पैकी 18 जागा महायुतीकडे असून विधानसभा निवडणुकीत 21 पैकी 21 जागा जिंकण्याचे आमचे लक्ष्य आहे.”
माधुरी मिसाळ म्हणाल्या, “पंकजाताई यांची तब्येत बरी नसतानाही आज त्या माझ्या पदयात्रा रॅलीमध्ये सहभागी झाल्या आहेत. त्यांच्या उपस्थितीत माझ्या प्रचाराच्या शुभारंभ झाला असून मतदारसंघात विविध विकास कामे आतापर्यंत मार्गी लावली असल्याने मतदार पुन्हा एकदा मला विक्रमी मतांनी निवडणुकीत विजयी करतील.’
