पुणे – व्यावसायिक वापराच्या एलपीजी सिलिंडरचा तुटवडा वाढू लागल्याने पुण्यातील हॉटेल आणि रेस्तराँ व्यवसाय अडचणीत आला आहे. त्यामुळे अन्न तयार करण्याचे प्रमाण कमी करावे लागत असून काही ठिकाणी ऑनलाइन ऑर्डर स्वीकारण्यावरही मर्यादा घालण्यात आल्या आहेत. परिणामी स्विगी, झोमॅटो आणि इतर ऑनलाइन अन्न वितरण सेवांवरही याचा परिणाम दिसू लागला आहे.पुणे शहरात स्विगी, झोमॅटो आणि इतर अन्न वितरण सेवांमधून हजारो डिलिव्हरी कर्मचारी कार्यरत आहेत. मात्र व्यावसायिक वापरासाठी लागणाऱ्या एलपीजी सिलिंडरचा तुटवडा निर्माण झाल्याने शहरातील हॉटेल आणि रेस्तराँ व्यवसायासमोर मोठे आव्हान उभे राहिले आहे. या परिस्थितीचा थेट परिणाम आता अन्न वितरण करणाऱ्या कंपन्यांवर आणि त्यांच्या डिलिव्हरी कर्मचाऱ्यांवर होऊ लागला आहे.
मिळालेल्या माहितीनुसार, व्यावसायिक गॅस सिलिंडरच्या पुरवठ्यावर मर्यादा येत असल्याने अनेक हॉटेल चालकांना अडचणींचा सामना करावा लागत आहे. आंतरराष्ट्रीय घडामोडींमुळे गॅस पुरवठा साखळीवर परिणाम झाल्याचे सांगितले जात आहे. त्यामुळे काही हॉटेल्समध्ये अन्न तयार करण्याचे प्रमाण कमी करण्यात आले आहे, तर काही ठिकाणी हॉटेल्स आणि रेस्तराँ तात्पुरते बंद ठेवण्याची वेळ आली आहे.गॅसच्या कमतरतेमुळे ऑनलाइन अन्न ऑर्डर स्वीकारण्यावरही मर्यादा आणण्यात येत आहेत. परिणामी स्विगी आणि झोमॅटोवरून मिळणाऱ्या ऑर्डरची संख्या घटू लागली आहे. याचा थेट परिणाम या सेवांमध्ये काम करणाऱ्या डिलिव्हरी कर्मचाऱ्यांच्या उत्पन्नावर होत असल्याचे समोर आले आहे.डिलिव्हरी क्षेत्रात काम करणारे परशुराम कांबळे यांच्यासारख्या अनेक कर्मचाऱ्यांची स्थिती सध्या चिंताजनक बनली आहे. ऑर्डर कमी झाल्यामुळे दिवसाला मिळणाऱ्या फेऱ्यांची संख्या घटली असून त्याचा आर्थिक फटका बसत असल्याचे ते सांगतात.हॉटेल व्यावसायिकांचे म्हणणे आहे की, गॅस सिलिंडरचा पुरवठा नियमित झाला नाही तर येत्या काळात परिस्थिती अधिक गंभीर होऊ शकते. तुटवडा वाढल्यास अन्न उत्पादन आणखी कमी करावे लागेल आणि त्याचा परिणाम हॉटेल व्यवसायासह अन्न वितरण सेवांवरही अधिक प्रमाणात जाणवू शकतो.दरम्यान, व्यावसायिक गॅस सिलिंडरचा पुरवठा सुरळीत व्हावा आणि हॉटेल व्यवसायासमोरील अडचणी दूर व्हाव्यात, अशी अपेक्षा हॉटेल व्यावसायिक आणि डिलिव्हरी कर्मचारी व्यक्त करत आहेत.
