पिंपरी : आखाती युद्धाच्या पार्श्वभूमीवर मार्चच्या पहिल्या आठवड्यापासून निर्माण झालेला घरगुती आणि व्यावसायिक गॅसचा तुटवडा एप्रिल अखेरपर्यंत कायम असल्याचे चित्र शहरात दिसत आहे. तब्बल ५० दिवस उलटूनही परिस्थितीत कोणताही ठोस बदल झालेला नाही. वाढती मागणी आणि मर्यादित पुरवठा यामुळे सर्वसामान्य नागरिकांसह व्यावसायिकांनाही मोठ्या अडचणींचा सामना करावा लागत आहे.
घरगुती गॅससाठी नागरिकांना अजूनही १० ते १५ दिवस प्रतीक्षा करावी लागत आहे. सिलिंडर वेळेवर मिळत नसल्याने अनेक कुटुंबांचे दैनंदिन जीवन विस्कळीत झाले आहे. स्वयंपाकाची वेळ, घरगुती नियोजन यावर त्याचा थेट परिणाम होत असून, पर्यायी उपाय शोधावे लागत आहेत.
दुसरीकडे, व्यावसायिक गॅसचा तुटवडा अधिक तीव्र स्वरूपात जाणवत आहे. हॉटेल, खानावळी, छोटे उद्योग आणि अन्य सेवा क्षेत्रातील व्यवसायिकांना गॅसचा पुरवठा वेळेवर होत नसल्याने त्यांचे कामकाज अडचणीत आले आहे. शासनाकडून ५० टक्के पुरवठ्याच्या सूचना देण्यात आल्या असल्या, तरी प्रत्यक्षात कंपन्यांकडून केवळ २० टक्केच पुरवठा केला जात असल्याच्या तक्रारी समोर येत आहेत.
कडक अटी आणि मर्यादित वितरणामुळे लघुव्यावसायिकांचे विशेष हाल होत आहेत. गॅस उपलब्ध नसल्याने काही ठिकाणी व्यवसाय बंद ठेवण्याची वेळ येत आहे, तर काही ठिकाणी उत्पादन आणि सेवा कमी करावी लागत आहे. याचा थेट परिणाम त्यांच्या उत्पन्नावर होत असून आर्थिक संकट अधिक गडद होत आहे.
गॅस टंचाईमुळे निर्माण झालेल्या या परिस्थितीबाबत नागरिक आणि व्यावसायिकांकडून तीव्र नाराजी व्यक्त केली जात आहे. बॅकलॉग भरून काढण्यासाठी आणि पुरवठा सुरळीत करण्यासाठी तातडीने उपाययोजना करण्याची मागणी जोर धरत आहे.
सध्याची परिस्थिती पाहता प्रशासन आणि गॅस पुरवठा करणाऱ्या कंपन्यांमध्ये प्रभावी समन्वय होणे अत्यावश्यक ठरते. पुरवठा वाढविणे, वितरण व्यवस्थेत सुधारणा करणे आणि ग्राहकांना वेळेत गॅस उपलब्ध करून देणे, या बाबींवर तत्काळ लक्ष देण्याची गरज आहे.
एकूणच, गॅस तुटवड्याची समस्या दीर्घकाळ टिकल्यास त्याचे परिणाम अधिक गंभीर होऊ शकतात. त्यामुळे परिस्थिती पूर्वपदावर आणण्यासाठी तातडीने ठोस निर्णय घेणे गरजेचे असल्याचे स्पष्ट होत आहे.
