नवी दिल्ली : संघ लोकसेवा आयोगाने (UPSC) नागरी सेवा परीक्षा २०२५ चा अंतिम निकाल जाहीर केला असून राजस्थानमधील चित्तोडगड येथील अनुज अग्निहोत्री यांनी ऑल इंडिया रँक १ पटकावत देशात अव्वल स्थान मिळवले आहे. वैद्यकीय शिक्षण पूर्ण करून नागरी सेवेत प्रवेश करण्याचा त्यांचा निर्णय अनेक स्पर्धकांसाठी प्रेरणादायी ठरला आहे.
संघ लोकसेवा आयोगाने शुक्रवारी नागरी सेवा परीक्षा २०२५ चा अंतिम निकाल जाहीर केला. राजस्थानच्या चित्तोडगड जिल्ह्यातील अनुज अग्निहोत्री यांनी देशभरातील लाखो स्पर्धकांमध्ये बाजी मारत पहिला क्रमांक मिळवला. त्यांनी जोधपूर येथील AIIMS मधून एमबीबीएसचे शिक्षण पूर्ण केले असून डॉक्टरकीचा मार्ग सोडून नागरी सेवेत झेप घेतली. निकाल जाहीर होण्यापूर्वी ते केंद्र सरकारच्या दिल्ली, अंदमान आणि निकोबार नागरी सेवा (DANICS) मध्ये प्रोबेशनर म्हणून कार्यरत होते.
प्रेरणादायी शैक्षणिक प्रवास
अनुज अग्निहोत्री यांचे दहावीपर्यंतचे शिक्षण अॅटोमिक एनर्जी सेंट्रल स्कूलमध्ये झाले. त्यानंतर बारावीचे शिक्षण त्यांनी स्पर्धा परीक्षांसाठी प्रसिद्ध असलेल्या कोटा शहरातील एम.बी. पब्लिक सीनियर सेकंडरी स्कूलमधून पूर्ण केले. त्यानंतर त्यांनी जोधपूर येथील AIIMS मधून एमबीबीएस पदवी घेतली. वैद्यकीय क्षेत्रात करिअर करण्याऐवजी देशसेवेची प्रेरणा घेऊन त्यांनी नागरी सेवेकडे वळण्याचा निर्णय घेतला.
टॉप ३ उमेदवार
नागरी सेवा परीक्षेच्या अंतिम निकालात अनुज अग्निहोत्री यांनी पहिला क्रमांक मिळवला. त्यांच्या पाठोपाठ राजेश्वरी सुवे एम यांनी दुसरा तर आकांश ढुल यांनी तिसरा क्रमांक पटकावला.
टॉप २० उमेदवारांची यादी
१. अनुज अग्निहोत्री
२. राजेश्वरी सुवे एम
३. आकांश ढुल
४. राघव झुनझुनवाला
५. ईशान भटनागर
६. झिनिया अरोड़ा
७. ए.आर. राजा मोहिद्दीन
८. पक्षल सेक्रेटरी
९. आस्था जैन
१०. उज्ज्वल प्रियांक
११. यशस्वी राज वर्धन
१२. अक्षित भारद्वाज
१३. अनन्या शर्मा
१४. सुरभी यादव
१५. सिमरनदीप कौर
१६. मोनिका श्रीवास्तव
१७. चितवन जैन
१८. श्रुती आर
१९. निसार दिशांत अमृतलाल
२०. रवी राज
९५८ उमेदवारांची निवड
या परीक्षेद्वारे एकूण ९५८ उमेदवारांची भारतीय प्रशासकीय सेवा (IAS), भारतीय पोलीस सेवा (IPS), भारतीय विदेश सेवा (IFS) आणि इतर केंद्रीय सेवांमध्ये नियुक्तीसाठी शिफारस करण्यात आली आहे. यापैकी सुमारे १८० उमेदवार IAS, १५० उमेदवार IPS तर ५५ उमेदवार IFS सेवेत रुजू होणार आहेत.
परीक्षेचे तीन टप्पे
देशातील सर्वात कठीण स्पर्धा परीक्षांपैकी एक मानल्या जाणाऱ्या नागरी सेवा परीक्षेचे तीन टप्पे असतात—पूर्वपरीक्षा, मुख्यपरीक्षा आणि मुलाखत. यंदाची पूर्वपरीक्षा २५ मे २०२५ रोजी घेण्यात आली. मुख्यपरीक्षा २२ ते ३१ ऑगस्ट २०२५ दरम्यान झाली. त्यानंतर एकूण २,७३६ उमेदवारांना मुलाखतीसाठी बोलावण्यात आले होते. मुलाखत प्रक्रिया ५ जानेवारी ते २७ फेब्रुवारी २०२६ दरम्यान पार पडली.
निकाल कसा पाहाल?
उमेदवार आयोगाच्या अधिकृत संकेतस्थळावर जाऊन नागरी सेवा अंतिम निकाल २०२५ ची लिंक उघडून मेरिट यादीची PDF डाउनलोड करू शकतात. रोल नंबरच्या आधारे आपले नाव व क्रमांक तपासता येईल. आयोगाने सांगितले की अंतिम निकालानंतर सुमारे १५ दिवसांत सर्व उमेदवारांचे गुण अधिकृत संकेतस्थळावर उपलब्ध करून दिले जातील.
