पुणे :– पुणेकरांच्या बहुप्रतिक्षित हिंजवडी–शिवाजीनगर मेट्रो प्रकल्पाच्या पहिल्या टप्प्याची प्रवासी सेवा सुरू करण्यासाठी आवश्यक सर्व तयारी पूर्ण झाली असून, आता राज्य सरकारच्या उद्घाटनाच्या निर्णयाची प्रतीक्षा आहे. पुणे महानगर प्रदेश विकास प्राधिकरण (पीएमआरडीए) आणि पुणे आयटी सिटी मेट्रो रेल लिमिटेड (पीआयसीटीएमआरएल) यांनी पहिल्या टप्प्यातील सर्व आवश्यक कामे पूर्ण झाल्याची माहिती राज्य शासनाला सादर केली आहे. त्यामुळे या मार्गावरील मेट्रो सेवा प्रत्यक्षात कधी सुरू होणार, याकडे नागरिकांचे लक्ष लागले आहे.
हिंजवडी आयटी पार्क आणि शिवाजीनगर दरम्यान दररोज मोठ्या प्रमाणावर वाहतूक कोंडी होत असल्याने या मेट्रो प्रकल्पाकडून प्रवाशांना मोठ्या अपेक्षा आहेत. मात्र, यापूर्वी अनेक वेळा जाहीर झालेल्या मुदती पुढे ढकलल्या गेल्याने नागरिकांमध्ये नाराजी होती. जून महिन्यात १५ जुलैपर्यंत सेवा सुरू करण्याचा दावा करण्यात आला होता, मात्र तोही पूर्ण होऊ शकला नव्हता.
दरम्यान, मेट्रोच्या पहिल्या टप्प्याची सुरक्षा आणि तांत्रिक तपासणी करण्यासाठी कमिश्नर ऑफ मेट्रो रेल सेफ्टी (सीएमआरएस) यांच्या पथकाने ५ ते ८ जुलैदरम्यान मार्गाची पाहणी केली होती. तपासणीनंतर काही तांत्रिक सुधारणा सुचविण्यात आल्या होत्या. पीआयसीटीएमआरएलने त्या निर्धारित कालावधीत पूर्ण करून त्याबाबतचा अहवाल सादर केला आहे.
सीएमआरएस हा विभाग केंद्रीय नागरी विमान वाहतूक मंत्रालयाच्या अखत्यारित असल्याने केंद्रीय राज्यमंत्री मुरलीधर मोहोळ यांनी नवी दिल्लीत सीएमआरएसचे आयुक्त जनक गर्ग यांच्याशी चर्चा करून अंतिम मंजुरीची प्रक्रिया गतीमान करण्याची विनंती केली होती. त्यानंतर आवश्यक प्रशासकीय प्रक्रिया वेगाने पूर्ण करण्यात आली.
पीएमआरडीए आणि पीआयसीटीएमआरएलने राज्य शासनाला कळविलेल्या माहितीनुसार, पहिल्या टप्प्यातील १२ स्थानके प्रवासी सेवेसाठी पूर्णपणे तयार आहेत. या मार्गावर मेट्रो धावण्यासाठी आवश्यक तांत्रिक सुविधा, स्थानकांची तयारी आणि सुरक्षा व्यवस्था पूर्ण करण्यात आली आहे.
उर्वरित स्थानकांच्या कामांनाही वेग देण्यात आला आहे. शिवाजीनगरसह आणखी पाच स्थानकांची कामे ऑगस्ट अखेरपर्यंत पूर्ण करण्याचे नियोजन असून, उर्वरित सहा स्थानकांचे बांधकाम पुढील वर्षी जुलैपर्यंत पूर्ण होईल, अशी माहिती यापूर्वी पीएमआरडीएचे आयुक्त डॉ. अभिजीत चौधरी यांनी दिली होती.
हिंजवडी–शिवाजीनगर मेट्रो सुरू झाल्यानंतर आयटी कंपन्यांमध्ये काम करणारे कर्मचारी, विद्यार्थी आणि दैनंदिन प्रवाशांना मोठा दिलासा मिळणार आहे. वाहतूक कोंडीत घट, प्रवासाचा वेळ कमी होणे आणि पर्यावरणपूरक सार्वजनिक वाहतुकीला चालना मिळणे, असे अनेक फायदे या प्रकल्पातून अपेक्षित आहेत.
आता सर्व तांत्रिक आणि प्रशासकीय तयारी पूर्ण झाल्याने राज्य सरकारकडून उद्घाटनाची तारीख जाहीर होण्याचीच प्रतीक्षा असून, पुणेकरांच्या बहुप्रतिक्षित मेट्रो प्रवासाला लवकरच प्रत्यक्ष सुरुवात होण्याची शक्यता निर्माण झाली आहे.
